sangs rgyas bcom ldan ’das rgyal po’i khab na ’od ma’i tshal ka lan da ka’i gnas na bzhugs so| de’i tshe ’dzam bu’i gling na grong khyer chen po rgyal po’i khab dang sgra sgrog ces bya ba gnyis yod de| gang gi tshe rgyal po’i khab rgud pa de’i tshe na ni| sgra sgrog ’byor par ’gyur la| gang gi tshe sgra sgrogs rgud pa de’i tshe na ni| rgyal po’i khab ’byor par ’gyur ro| grong khyer chen po sgra sgrog na rgyal po u tra ya na zhes bya bas rgyal srid ’byor ba rgyas pa bde ba lo legs pa skye bo dang mi mang pos gang ba ’thab mo dang ’thab pa dang phyi dgra dang nang ’khrug rab tu zhi ba chom rkun dang mu ge dang nad dang bral ba ’bras sa’ lu dang bu ram shing gi phreng ba dang ba lang dang ma he phun sum tshogs pa byed du bcug ste| chos dang ldan pa chos kyi rgyal pos chos kyi rgyal srid byed du bcug go| de na shing ljon pa dag kyang rtag tu me tog dang ’bras bu ’chags pa yin zhing| lhas kyang dus dang dus su char gyi rgyun legs par ’bebs pas| lo tog shin tu phun sum tshogs par gyur to| de la btsun mo zla ’od ces bya ba gzugs bzang ba blta na sdug pa mdzes pa yan lag dang nyin lag thams cad dang ldan pa dang bu rgyal tshab gtsug phud can zhes bya ba dang blon po’i mchog he ru ka dang bhi ru ka zhes bya ba gnyis yod do| grong khyer rgyal po’i khab na ma ga dhar byung ba’i rgyal po bzo sbyangs gzugs can snying pos rgyal srid ’byor pa rgyas pa bde ba lo legs pa skye bo dang mi mang pos gang ba ’thab mo dang ’thab pa dang phyi dgra dang nang ’khrug rab tu zhi ba chom rkun dang mu ge dang nad dang bral ba sa’ lu dang bu ram shin gi phreng ba dang ba lang dang ma he phun sum tshogs pa byed du bcug ste| chos dang ldan pa chos kyi rgyal pos chos kyi rgyal srid byed du bcug go| de na yang shing ljon pa dag kyang rtag tu me tog dang ’bras bu ’chags shing| lhas kyang dus dang dus su char gyi rgyun legs par ’bebs pas| lo tog shin tu phun sum tshogs par gyur to| de la btsun mo lus ’phags ma zhes bya ba gzugs bzang ba blta na sdug pa mdzes pa| yan lag dang nyin lad thams cad dang ldan pa bu rgyal tshab ma skyes dgra zhes bya ba dang blon po’i mchog ma ga dha’i sna chen po la gtogs pa bram ze dbyar tshul zhes bya ba yod do| ji tsam dus gzhan zhig na rgyal po’i khab nas tshong pa dag zong thogs te| yul gzhan du ’phags nas| de dag mthar gyis grong dang grong rdal dang yul ’khor dang rgyal po’i pho brang dag tu tshong ’dus dag la rnam par lta ba na| grong khyer chen po sgra sgrog tu phyin to| ji tsam na rgyal po u tra ya na blon po’i tshogs kyis yongs su bskor te| don gyi gnas na ’dug pa na| tshong pa de dag skyes thogs te| rgyal po u tra ya na’i gan du dong ba dang| rgyal po u tra ya nas de dag la| ’ongs pa legs so| zhes bya ba’i tshig gis kun tu spyad de| gnas ji lta ba bzhin du ’khod do| rgyal po u ta ya nas de dag mthong nas| blon po rnams la smras pa| shes ldan dag| yul ’byor pa rgyas pa bde ba lo legs pa skye bo dang mi mang pos gang ba ’di lta bu dang lhas dus dang dus su char gyi rgyun legs par ’bebs shing| lo tog shin tu phun sum tshogs pa dang ldan pa’i rgyal po gzhan ’ga’ zhig yod dam| tshong pa de dag gis smras pa| lha| mchis te| shar gyi yul na grong khyer rgyal po’i khab ces bgyi ba de na rgyal po gzugs can snying po zhes bgyi bas rgyal srid ’byor pa rgyas pa bde ba lo legs pa skye bo dang mi mang pos gang ba bgyid du stsol ba| de na yang shing ljon pa dag kyang rtag tu me tog dang ’bras bu ’chags shing| lhas kyang dus dang dus su char gyi rgyun legs par ’bebs pas| lo tog shin tu phun sum tshogs pa lags so| rgyal po u tra ya na thos nas| de la rjes su chags pa skyes nas| des smras pa| shes ldan dag| rgyal po de’i yul na ci zhig dkon| blon po rnams kyis smras pa| lha ni rin po che’i mnga’ bdag lags la| rgyal po de ni gos kyi bdag po lags pas| de la rin po che dag dkon no| rgyal pos smras pa| shes ldan dag| gal te de ltar na| rin po che rtog pa dag bos shig| ces rgyal pos rin po che dag brtags shing| sgrom bkang nas| tshong pa de dag gi lag tu skyes su bskur zhing| ’phrin yig kyang| shed mthun dgyes pa| khyod bdag gis ma mthong ba’i grogs lags kyis| gal te grong khyer sgra sgrog tu khyod la bgyi ba cung zad mchis na| bdag la ’phrin yig skur cig dang| thams cad bsgrub bo| zhes bris te| bskur ro| de nas tshong pa de dag gis skyes dang ’phrin yig dang zong rin khyer te| rgyal po’i khab tu ’phags nas| mthar gyis rgyal po’i khab tu phyin to| de nas lam gyis dub pa’i ngal bsos nas| rin po che’i sgrom dang ’phrin yig de dag khyer te| rgyal po gzugs can snying po’i gan du dong nas| rkang pa gnyis la gtugs te| sgrom dang ’phrin yig dag phul nas| smras pa| lha| grong khyer sgra sgrog na rgyal po u tra ya na zhes bgyi ba des lha la skyes dang ’phrin yig ’di dag bskur ro| rgyal po gzugs can snying pos ’phrin yig bklags te| smras pa| shes ldan ’dag| rgyal po de’i yul na ci zhig dkon| blon po rnams kyis smras pa| lha ni gos kyi mnga’ bdag lags| rgyal po de ni rin po che’i bdag po lags pas| de la gos dag dkon no| de nas gzugs can snying pos gos rin po che dag gis sgrom bkang ste| skyes su bskur zhing| ’phrin yig kyang| shed mthun dgyes pa| khyod kyis ’phrin yig springs pa des ’jal te| khyod kyang bdag gis ma mthong ba’i grogs lags kyis| rgyal po’i khab tu khyod la yang bgyi ba cung zad mchis na| bdag la ’phrin yig springs shig dang| thams cad bsgrub bo| zhes bris te| blon po rnams la bsgo ba| skyes dang ’phrin yig ’di khyer la| pho nya dag las skur cig| blon po rnams kyis pho nya dag las bskur ba dang| de dag gis skyes dang ’phrin yig de dag khyer te| sgra sgrog tu ’phags nas| mthar gyis sgra sgrog tu phyin to| de nas lam gyis dub pa’i ngal bsos te| gos kyi sgrom dang ’phrin yig de dag khyer nas| rgyal po u tra ya na’i gan du song ste| rkang pa gnyis la gtugs nas| sgrom dang ’phrin yig dag phul te| smras pa| lha| rgyal po gzugs can snying po lha la skyes ’di dang ’phrin yig ’di bskur ro| rgyal po u tra ya nas ’phrin yig bklags te| smras pa| shes ldan dag| rgyal po de’i chu zheng ci ’dra| de dag gis smras pa| lha’i ci ’dra ba kho na lta bu’o| blon po rnams kyis smras pa| lha| de lta bu lags mod kyi| ’on kyang rgyal po de rang gis mtshon ’debs pa nye ’khor gyi mkhar gyi rgyal po rnams dang lhan cig rang gis g.yul ’gyed cing g.yul ’gyed du stsol ba lags so| rgyal po u tra ya na la nor bu’i khrab yan lag lnga po dus tshigs su reg pa bde ba dang gcad dka’ ba dang dbug dka’ ba dang dug ’jil ba dang snang ba’i bdag nyid dang ldan pa zhig yod nas| rgyal po u tra ya nas blon po rnams la smras pa| shes ldan dag| rgyal po de gal te rang gis mtshon ’debs pa nye ’khor gyi mkhar gyi rgyal po rnams dang lhan cig g.yul ’gyed cing g.yul ’gyed du ’jug pa yin na| de la nor bu’i khrab ’di bskur gyis| pho nya dag sta gon gyis shig| de dag gis pho nya dag sta gon byas nas| rgyal po u tr ya nas rin po che’i khrab de dang ’phrin yig kyang ’di skad ces| shed mthun dgyes pa| khyod la bdag gis nor bu’i khrab ’di skyes su bskur te| ’di yang yon tan lnga po dus tshigs su reg pa bde ba dang gcad dka’ ba dang| dbug dka’ ba dang dug ’jil ba dang snang ba’i bdag nyid dang ldan pa lags kyis| khyod ’di bdag dang rkyen pas| rang nyid kyis bcang bar bgyi zhing| su la yang stsal bar mi bgyi’o| zhes bris te| bskur ro| pho nya rnams kyis skyes de dang ’phrin yig khyer te| rgal po’i khab tu ’phags nas| mthar gyis rgyal po’i khab tu phyin to| de nas lam gyis dub pa’i ngal bsos nas| nor bu’i khrab de dang ’phrin yig khyer te| rgyal po gzugs can snying po’i gan du dong nas| rkang pa la gtugs te| nor bu’i khrab dang ’phrin yig phul nas| smras pa| lha| rgyal po u tra ya nas lha la skyes ’di dang ’phrin yig ’di bskur ro|