mdzangs blun kun tu rgyus tshul khrims bsrung ba’i le’u| ’di skad bdag gis thos pa| dus gcig na bcom ldan ’das mnyan yod na rgyal bu rgyal byed kyi tshal mgon med zas sbyin gyi kun dga’ ra ba na bzhugs so|| de’i tshe nam gyi cha stod na lha gnyis shig sangs rgyas gang na bar ’ongs so|| lha de’i lus kyi ’od kyis rgyal bu rgyal byed kyi tshal gser gyi mdog ltar gcig tu snang bar byas so|| de la bcom ldan ’das kyis ci rigs su dam pa’i chos bstan pas| sems rnam par grol te| gnyis kas byang chub kyi ’bras bu thob nas| bcom ldan ’das kyi zhabs la mgo bos phyag ’tshal te| phyir yang lha’i gnas su dong ngo|| phyi de nyin nam langs ma thag tu| kun dga’ bos bcom ldan ’das la ’di skad ces gsol xo|| mdang dag lha gnyis shig mchis te| bcom ldan ’das la bsnyen bkur bgyis nas| de’i lus kyi ’od kyis kun du snang zhing mdzes par bgyis pa ’di sngon las ci zhig bgyis na| de lta bu’i ’bras bu thob par gyur ces gsol pa dang| bcom ldan ’das kyis kun dga’ bo la ’di skad ces bka’ stsal to|| sngon sangs rgyas ’od srung mya ngan las ’das nas| dam pa’i chos ’jig tu nye ba na| bram ze gnyis shig nyin zhag gcig pa’i tshul khrims brgyad mnos te| de dag la gcig gis ni lhar skye bar shog ces smon lam btab bo|| gcig gis ni rgyal por gyur cig ces smon lam btab nas| phyir khyim du dong ngo|| de la gcig khyim du ’ongs nas| chung mas zan la bos na| khyos ’di skad ces smras so|| bdag sangs rgyas kyi chos las phyi dro kha zas mi bza’ ba’i khrims mnos kyis| mi ’dod do|| chung mas smras pa| khyod ni kun du rgyu yin te| bdag cag gi chos kyi tshul khrims yod na| ci’i phyir ston pa gzhan gyi tshul khrims nod| gal te bdag dang lhan cig zan mi za na| khyod ji skad smras pa bzhin du kun du rgyu gzhan dag la bsnyad de| khyod dang lhan cig tu ’du zhing gtam zer du mi gnang bar skrod du gzhug go| de skad ces smras pa dang| khyos ma bzod de| dngangs skrag nas| chung ma dang lhan cig tu dus ma yin pa’i zan zos so|| mi de gnyis tshe’i dbang thang ji tsam du thug pa bzhin du so so nas tshe’i dus byas nas| rgyal por smon pa de ni tshul khrims bsrungs pas| rgyal po’i rigs su skyes so|| lhar skye bar smon pa de ni tshul khrims nyams pas| klu zhig tu skyes so|| de’i tshe na rgyal po’i bza’ shing gi ra ba srung ba zhig nyin cig bzhin du shing thog rnam pa sna tshogs skyel skyel ba las| phyis dus gcig cig na chu mig gi nang nas ku shu kha dog dang dri bsung dang ldan pa cig rnyed nas| ’di snyam du bsams so|| bdag shing tog skyel zhing phan tshun ’gro ba’i tshe rtag tu sgo bas bkag ste| legs par ’gror mi ster gyis| ku shu ’di sgo ba la sbyin no snyam du bsams nas| rgyal po’i chab sgo ba la byin no|| chab sgo ba des kyang shing tog de blangs nas| ’di snyam du bsams so|| zhu zhing gsol ba la ’gro ba’i tshe rtag tu nyug rum gyis bkag nas| nyam bag du ’gror mi ster gyis| ku shu ’di nyug rum de la sbyin no snyam bsams nas| nyug rum la byin no|| nyug rum gyis kyang blangs nas| btsun mo la phul lo|| btsun mos thogs nas| rgyal po la phul lo|| rgyal pos ku shu de zos nas| rab tu mngar zhing lhag par dri bsung dang ldan pas| btsun mo la| ku shu ’di ga las rnyed ces dris na| btsun mos kyang ji ltar rnyed pa’i gtam zhib du byas nas| gcig nas gcig tu thug ste| tha mar ra ba bsrung ba la thug nas| rgyal pos ra ba bsrung ba bkug ste| de la ’di skad ces bka’ stsal to|| nga’i bza’ shing gi ra ba na shing tog ’di lta bu dag yod na| ci’i phyir nga la mi ’bul bar gzhan dag la sbyin zhes bka’ stsal pa dang| ra ba bsrung ba des thog ma ji ltar rnyed pa zhib tu gsol to|| de nas rgyal pos ra ba bsrung ba de la| da phyin cad ku shu ’di lta bu rtag tu phul cig 144a ces bka’ stsal pa dang| ra ba bsrung ba des ’di skad ces gsol to|| ku shu ’di ni ’bras bu las skyes pa ma lags te| chu mig gcig gi nang nas rnyed pas| slan cad ni bdag gis mi rnyed de| mi ’byor to zhes gsol to|| de la rgyal pos kyang| khyod kyis phyin cad ma rnyed na| khyod kyi lus dum bur dum bur gcod do zhes bka’ stsal nas| ra ba bsrung ba de phyir gnas su song nas| mya ngan byed cing ngus pa dang| ngus pa’i sgra chen po klu zhig gis thos nas| klu de mi zhig tu sprul te| de la| khyod ci’i phyir mi dga’ zhing ngu zhes dris so|| ra ba srung ba des ji ltar gyur pa’i gtam klu la zhib tu smras pa dang| klu mi snang bar gyur nas| ring po ma lon par gser gyi gzhong ba’i nang| shing tog bzang pos bkang ste| mi de la byin nas| khyod kyis shing tog ’di khyer la| rgyal po la phul te| ’phrin du yang ’di skad ces gyis shig| rgyal po dang bdag tu bshes lags te| sngon tshe snga ma la gnyi ga kun du rgyu yin pa las| nyin zhag gcig pa’i tshul khrims brgyad mnos te| so sor smon lam btab pa las| rgyal pos tshul khrims bsrungs pas| rgyal por gyur to|| bdag ni tshul khrims nyams pas| klur skyes kyis| nga yang tshul khrims bsrung zhing lus ’di las thar par dga’o|| nyin zhag gcig pa’i khrims brgyad kyi cho ga bdag la stsal du gsol|| ji ste ma gnang na| rgyal po’i yul yang rgya mtshor bsgyur ro zhes phrin spring ngo|| ra ba srung ba des shing thog khyer te| rgyal po la phul nas| klus spring ba’i phrin yang rdzogs par bsnyad pa dang| rgyal po de mi dga’ bar gyur to|| de ci’i phyir| zhe na| de’i tshe ’jig rten na sangs rgyas kyang mi bzhugs|| dam pa’i chos kyang nub nas| nyin zhag gcig pa’i khrims brgyad kyi dpe yang mi rnyed do|| don de ma bsgrubs na ni| gnod pa mngon du byas kyis dogs pas| rtog pa la zhugs te| mi dga’ nas| sems shing ’dug ’dug pa na| rgyal po des blon po chen po mchog cig yod pa la ’di skad ces bka’ stsal to|| klu zhig nga la khrims brgyad kyi dpe zhig slong gis| mi rnyed du mi rung ngo zhes bka’ stsal nas| blon pos gsol ba| ’jig rten na chos ma mchis par bdag gis ga la rnyed ces gsol pa dang| rgyal po des blon po de la| khyod kyis ma rnyed na| gsod do zhes bka’ stsal to|| blon po de shin du mi dga’ bzhin du khyim du song nas| blon po de la pha chen po rgan po rgas ’khogs pa zhig yod de| phas bltas na| bdag gi bu ’di sngon cad ni ’dzum dmul te| mdangs dang bcas gtam zer na| deng ci’i phyir bdag gi bu sngon cad dang mi ’dra bar ’dzum gnag ces gtam byas pa dang| des ji ltar gyur pa pha la zhib tu gtam byas so|| de’i phas smras pa| bdag cag gi khyim na ka ba zhig las rtag tu ’od byung ste| de’i nang na ci yod| ltos shig ces bsgo pa dang| ka ba phyung ste| gshags na| de’i nang nas rten cing ’brel te ’byung ba bcu gnyis kyi mdo dang nyin zhag gcig pa’i khrims brgyad kyi dpe byung ste| blon po des rgyal po la phul lo|| rgyal pos thos nas| rab tu dga’ mgu rangs te| khrims brgyad kyi dpe gser gyi sgrom bur bcug ste| klu la skur ro|| klu des thob nas| shin tu dga’ bas| rgyal po chen po de la rin po che yang mang du phul lo|| nyin zhag gcig pa’i khrims brgyad bsrungs nas| gzhan dag kyang bsrung bar bskul te| de nas tshe ’phos nas| lhar skyes so|| rgyal po de yang chos bzhin du tshul khrims bsrungs pas| tshe’i dus byas nas| lhan cig tu lhar skyes te| mdang nam gyi cha stod na nga’i spyan sngar ’ongs te| ci rigs pas chos bstan pas| rgyun tu zhugs pa’i ’bras bu thob nas| ngan song gsum dang yongs su bral te| lha dang mi’i longs spyod myong 145a zhing| mthar mya ngan las ’da’ ba’i bar du thob par gyur to|| bcom ldan ’das kyis de skad ces gsungs pa la ’khor mang po thams cad yid rang nas| mngon par dga’o|| kun tu rgyus tshul khrims bsrungs pa’i le’u ste| gsum pa’o|| ||